واقول للنـاس هـذه عـز ميثاقـي
اللي لها لين اموت السمع والطاعـه
الجادل اللي من اهل المستوى الراقي
رفيعـة الـذوق للمعلـوق مزاعـه
الله فرقها علـى زينـات الاخلاقـي
بيت الشرف بيتها وتعيش برباعـه
بنت الترف واسم ابيها درعها الواقي
والخال شيخ يحوش الطيب بذراعـه
مـن ماكـر مالجابـه كـل نعاقـي
ماكر حرار تشـوق العيـن طلاعـه
ريحانة في ظـلال وتحتهـا ساقـي
من دونها الموت والسلال واتباعـه
خذت من اوصاف يوسف كل ما لاقي
زعيمة الحسـن مياسـه وجزاعـه
ان اقبلت قلت ماتت لوعـة افراقـي
وان دبرت قلت عاش البين واوجاعه
وان وقفت وقفن تلعـات الاعناقـي
وان عرضت من لمحها دق باصباعه
يخضع لها الراهب العاصي وينساقي
وقلوب الابطال منها شبـه مرتاعـه
حبيبتـي والغـلا ماعـاد ينطـاقـي
شرواي ماتدركـه فزعـاة فزاعـه
انتي مدار الفلـك وعيونـك افاقـي
وانا الذي عاش حبك باربع ارباعـه
لبيه...لبيـه يافـيـي ومشـراقـي
ياغلا غلا في حياتي يااثمن بضاعـه
يالذ من فرحتي بـك لحظـة عناقـي
قلب وهبته عيونك ترفض ارجاعـه
مدامني لك مليك وترفـض اعتاقـي
قلب يكسب الكنز عاش ومات ماباعه
حبيبتي والقلم يشرب مـن اعماقـي
عساي بينك وبين الشـر واطماعـه
لا يابعد عمري اللـي راح والباقـي
ياجعل يومي قبل يومك لـو بساعـه